Өөртөө үнэнч байж, үнэ цэнэтэй амьдралыг бүтээцгээе

Өнөөдөр 12 дугаар сарын 1, дэлхий нийтээрээ хайртдаа үнэнч байхыг уриалдаг өдөр.
Харин миний хувьд хайртдаа бус өөртөө үнэнч байж, үнэ цэнэтэй сайн сайхан амьдралыг цогцлоон босгохыг уриалж байна.

Миний хайрт нөхөр, хань ижил гэдэг бол угтаа би өөрөө л юм. Аливаа эмэгтэйг нөхрөөр нь, эрэгтэйг эхнэрээр нь шинждэг ёс миний сайхан оронд байдаг. Түүнчлэн манай Монгол ёсонд эхнэр, нөхөр хоёрыг нэг хүн гэж үздэг учир цагаан сараар хоорондоо золгодоггүй уламжлалтай. Тиймээс миний нөхөр бол би, харин би бол миний нөхөр юм.

Бид нэгэн бие болж, нэгэн амьдралын төлөө, үр хүүхдүүдийнхээ ирээдүйн сайн сайхны төлөө, өөрсдийн ирээдүйн амар амгалан, урт удаан аз жаргалтай амьдралын төлөө хамтдаа тэмүүлэлтэйгээр ажилладаг учир бид хоёрын хэн нэгэнтэй холбоотой бүх зүйл хэн хэнд маань хамаатай, бидний амьдралын доройтох, өөдлөхын шалтгаан болон оршиж байдаг.

Тиймээс хань ижлээ хуурна гэдэг бол угтаа өөрийгөө болон өөрийнхөө амьдралыг хуурч буйтай адилхан. Та бидний өөрийгөө хуурсан сэтгэл биднийг харалган болгодог. Бид өөрийнхөө нүдийг боочихоод хэр хол явж чадах вэ? хэр зэрэг саадыг давж чадах уу? Яг л үүнтэй адил. Бидний үнэнч байдал, үнэ цэнээ мэдэрч, итгэлтэйгээр, нүүр бардам урагш тэмүүлэх амьдрал биднийг аз жаргалын хөлөг онгоцонд суулгаж, хүссэн сэтгэл ханамжаа эдлэх боломж олгодог.

Ийм л учраас ирээдүйн аз жаргалтай, үнэ цэнэтэй, урт удаан, сайн сайхан амьдралынхаа төлөө ӨӨРТӨӨ ҮНЭНЧ БАЙЦГААЯ.

Хайрт дүү нартаа баярлалаа

Би их азтай хүн. Байнга шинийг санаачилж, бусдын алхсан мөрөөр бус цоо шинэ мөр гарган бусдыг араасаа дагуулдаг олон сайхан дүү нар минь миний бахархал. Тэд бол 2008 онд "Яруу сэтгэгч" сонины эрхлэгч, дүү Лувсандоржтойгоо хамтран, ХӨГЖИЛ хүний хөгжлийн төвөө байгуулан 2 жил орчим уйгагүй хөдөлмөрлөсний минь үр дүн. Миний хайртай, сайхан дүү нар минь, та бүгдэдээ эгч нь хайртай.
Хөгжил төвийн дүү нар маань үнэхээр сэтгэж чаддаг, хийж чаддаг мундаг хүүхдүүд байдаг. Тэдний нэг нь хоёрдугаар курсээсээ л ТББ байгуулан, Гадаад хэлний сургалтын төвөө нээж, өнөөг хүртэл байнга шинийг сэтгэн санаачилж, хийж бүтээж яваа ажил хэрэгч мундаг бүсгүй. Нөгөө нь нэг компанид менежерээр ороод ганц, хоёрхон сар ажлаад дэд захирал болж дэвшиж байсан чадалтай, бас чадвартай бүсгүй, бас нэг дүү маань Анагаахын зургаадугаар курс боловч хүмүүсийг өвчилсөн хойноо бус өвдөхөөсөө өмнө эрүүл мэнддээ анхаарал тавин, эрүүл амьдрах боломжийг судалж, ихийг санаачлан хийдэг бүсгүй байгаа... энэ мэтчилэн дурдаад байвал дуусахгүй олон сайхан дүү нар надад байна.

Тэд маань ажил дээр ирж зөвлөгөө өглөө. Хүн бүхэн завгүй болсон энэ цаг үед нөр их ажлынхаа хажуугаар сэтгэл зүрхээрээ зав гарган ирж, шинэ ажилд минь үнэтэй зөвлөгөө өгсөн хайрт дүү нартаа чин сэтгэлээсээ баярлалаа. Та нарын минь санаачлан хийж байгаа ажил бүхэн тань сэтгэлчлэн бүтэх болтугай. Хайртай шүү. АМЖИЛТ

Муу зан үйлээ ялан дийлэх ХЭТРҮҮЛГИЙН АРГА

Бид бүхэнд муу зан үйл, муу хандлага, муу зуршилууд тодорхой хэмжээгээр байдаг. Муу зүйлээс сайн сайхан, аз жаргал, сэтгэл ханамжийг өнө мөнхөд авч чадахгүй. Бид муу зүйл, муу зан үйл, муу хандлагаа эртхэн гээгээгүйгээс болж том хор уршгийг хүртдэг.

Тухайлбал: Ажлаас хоцордог зуршил тань амжилтаас хоцрооно, хардамхай сэтгэл тань гэр бүлийн аз жаргалыг мөхөөнө, гэх мэт

Тэгвэл тэр сөрөг хандлага, муу зуршил, муухай зангаасаа салах арга байна. Тухайн зүйлийн хор уршиг, ирээдүйд ирэх сөрөг үр дагаврыг хэтрүүлэн бодох, эсвэл олон тоон дээр аваачих, хүн бүхэн ингэвэл яах вэ? гэсэн өнцгөөс нь харах, улмаар өөрийгөө сайн сайхан цэг дээр тавьж томоор төсөөлснөөр муу бүхнээсээ салж болно. Та туршаад үзээрэй.

Жишээлбэл: Чихэр идээд цаасаа газар хаях гэж буй хүн: хүн бүхэн над шиг чихэр идээд цаасаа хаяад байвал бид хогон дунд өөрсдөө хогийн сав болж амьдрах бус уу? гээд бодоход л зөвхөн хогийн саванд хаяж байх сэдэл төрж байгаа биз? Түүнчлэн тамхи татаж буй хүмүүс, нэн ялангуяа охид бүсгүйчүүдийн хувьд Монгол эмэгтэй хүн бүхэн тамхи татан, магадгүй бүгд үргүй болвол яах вэ? Монгол улс мөхөх бус уу? тийм ээ би эх орноо өөрийн мунхаг сэтгэлээр үгүй хиймээргүй байна гэж бодоход хангалттай.

Түүнээс гадна өөрийнхөө ирээдүйн хүсч буй хамгийн өндөр цэг дээрээ байгаагаар төсөөлөх. Тухайлбал: Би чинь алдарт сурган хүмүүжүүлэгч байж, алдарт жүжигчин байж, алдарт зохион бүтээгч байж, ..... ингэж болно гэж үү? гэсэн хандлагаар хандахад л дотроос чинь өөрийн эрхгүй муу зүйлсийг үгүйсгэн, зөв зүйлийг хийгээд эхлэнэ.

Аливаа эхлэл... ажлын 50%

Аргын тооллын 2010.09.25 ны өдөр буюу билгийн тооллоор намрын дунд сарын 17 ны билэгт сайн өдөр урт хугацаагаар хүсэн мөрөөдөж байсан ИНДИГО хүүхдийн хөгжлийн төвийнхөө нээлтийг хийлээ.



Амьдрал гэдэг бол уул, бид удаан өгсөж, хурдан урууддаг... энэ бол манай Хөгжил клубыхны хэлэх дуртай үгсийн нэг. Бид амьдралдаа маш олон уулыг давдаг. Зарим нь намхан, зарим нь өндөр, зарим нь оройг нь харахаас ч үл зүрхлэмээр... Тодруулбал бидний зорилготой адил. Том,жижиг олон янзын зорилгууд...

Миний хувьд амьдралдаа давах ёстой том давааны маань нэг яах аргагүй хүүхдийн хөгжлийн төв билээ. Эрхэм зорилго маань хүүхэд бүхний зүрх сэтгэлд хүрч ажиллах. Би тэдний аз жаргалтай, сэтгэл хангалуун, гал цогтой нүдийг харах дуртай. Хүүхэд бүхний цэвэр ариун зүрх сэтгэлийг хэвээр хадгалан, сэтгэлийн болоод харилцааны өндөр боловсролтой, амьдралын зорилготой, эх оронч сэтгэлгээтэй байж, өөрөө өөрийнхөө болон эх орныхоо жинхэнэ эзэн нь болгож өсгөхийн төлөө өөрийн бүхий л оюун ухаан, сэтгэл зүрхээ зориулан ажиллах болно.

Миний амьдралдаа давах учиртай хамгийн өндөр уулруугаа авирах маш хүнд аялал яг одоо, эндээс эхэлж байна... Өмнө минь олон янзын саад бэрхшээлүүд гарч ирнэ. Гэсэн хэдий ч би өөрөө өөрийнхөө, оюун санаа, сэтгэл зүрхнийхээ эзэн нь байж чаддаг учир Миний үнэт зүйлрүү хэн ч халдаж үл чадна. Аливаа эхлэл аливаа зүйлийн тавин хувь нь байдаг. Тиймээс талд нь хүртэл авирсан энэ өндөр оргилруу хамаг хүчээрээ авирах болно.
Өөртөө амжилт хүсье.

Бээжингээс мэдэрсэн мэдрэмж

2010 оны 8 р сард ажлын шугамаар Бээжин яваад ирлээ. Өглөө 6 цагт Бээжинрүү орсон бөгөөд тэр үед хэдэн арван километр цуваа үүсгэн наашаа зөрж байгаа ачаатай, ачаагүй, урьд өмнө харж байгаагүй том том ачааны машинууд тасралтгүйгээр цувж байгаа нь нэг талаар бахархах сэтгэл төрүүлж байлаа. Хөдөөнөөс Улаанбаатар хотруу үүрээр орж ирэхэд бараг л нам гүм байдаг болохоор тэр. Ямар хөдөлмөрч хүмүүс вэ? гэж бодогдож байлаа. гайхалтай...


Бээжин хотруу ороод ирлээ... газар доорх метроны зам, газар дээрх учрыг нь хараад ойлгохгүй олон салаа уулзвартай замууд, агаарт гүүр үүсгэн сүлжилдсэн 5,6 н давхар замууд... өндөр, маш өндөр барилгууд, өнгө өнгөөр алагласан зүлэг ногоо, цэцэгс өөрийн эрхгүй хараа булааж,сэтгэл баясгаж байлаа... бас гайхалтай...


Анх удаа хоёр автобусыг холбосон мэт урт автобус, хоёр давхартай автобус гэх мэт урьд өмнө үзэж хараагүй олон зүйл үзлээ. Түүнээс гадна хотоор явж байгаа, миний харсан бүх машинууд Япон, Германы нэртэй брэндийх байсан ч гэсэн бүгд л Хятад улсдаа үйлдвэрлэгдсэн машинууд байсан нь үнэхээр гайхалтай байлаа. Хятад улсын бодлого тэр гэнэ. Гаднаас машин оруулж ирдэггүй, эрхийг нь аваад өөрсдөө дотооддоо үйлдвэрлэдэг. Бараг импорт гэдгийг мэддэггүй улс гэнэ. Хэрэгтэй бүх зүйлээ өөрсдөө үйлдвэрлэж, өөрсдийн зүйлээ өөрсдөө хэрэглэхээс гадна хамгийн хүчтэй экспортлогч улс... бас гайхалтай.

Хүмүүс нь хөгшин залуугүй нийтээрээ өглөө эрт босч, гадаах талбайдаа гаран гимнастик хийж байгаа нь бас гайхалтай харагдлаа. Нэг нэлээд настай эмээ бүр сунгалтын дасгал хийгээд зогсч байсан гээч.

Амьтны парк үзлээ... Африк, Америк бараг бүх л тивд байдаг амьтдыг гайхалтайгаар байршуулж, гайхалтай үүр засч өгч, гайхалтайгаар тохижуулжээ. Арслан, бар, заан, анааш, панда, матар, могой, усны үхэр, шувууд, сармагчин... бүгд л гайхалтай байлаа.








Их хотын хөгжил дэвшил, хүн зоны амгалан тайван байдал бүгд гайхалтай... Гэвч би тэнд хоёр шөнө, гурван өдрийг өнгөрүүлэхдээ маш ихээр уйтгарлан, сэтгэл бүр бүүдийчихлээ. Учир нь тэр миний гайхалтай гэж шохоорхон харж байсан зүйлс нэг л хормын баяслыг төрүүлж байсан болохоос урт удаан хугацааны баяр жаргалыг төрүүлэхгүй байлаа. Яагаад???

Өглөө босонгуутаа нүдээ онийлгон нарлуу харж, нарны алтрах туяанаас гайхалтай мэдрэмжийг мэдэрч эрч хүчээ сэлбэдэг миний сэтгэлд нар, хөх цэнхэр тэнгэр маань үгүйлэгдэж байлаа. Бээжингийн тэнгэр зэгэл саарал, манан татчихсан мэт бүүдийсэн өнгөтэй бөгөөд нартай өдөр нь ч нар гарч байгаа нь мэдэгдэхгүй, үргэлжилсэн саарал зүйлийн цаанаас бүүдийн харагддаг болохоор миний алган дээр нарны алтан цацраг тусахгүй байлаа...
Үнэндээ өнгө өнгөөр солонгорон ургах зүлэг, ногоо цэцэгс нь ямар ч үнэргүй болохоор сэтгэлд хүрсэнгүй... Амьсгалж байгаа агаар нь өөрт мэдрэгдэхгүй, би амьд байна уу? гэж өөрөөсөө асуумаар санагдуулж байлаа.

Мөн чанартаа амьсгалах тоолондоо, харах бүртээ, мэдрэх болгондоо жинхэнэ гайхалтай хэмээн дуу алддаг миний эх орон жинхэнэ гайхамшиг байсныг би улам бүр мэдэрлээ.

Бээжингээс эх оронруугаа орж ирэх үедээ өглөө вагоны цонхоор цэнхэртэн харагдах цэлмэг тэнгэр, туяаран орж ирж байгаа нарны алтан цацрагийг нүдээ онийлгон харж, өөрийн эрхгүй гүнзгий санаа алдан, сэтгэл бөглөсөн том хар чулуу унах шиг л болж, гайхалтай аз жаргалыг дахин мэдэрч, би эх орондоо хайртай, маш их хайртай гэж шивнэхэд өөрийн эрхгүй нулимс торж байлаа... Аз жаргал, жинхэнэ гайхамшгийг олж харсан миний сэтгэл.

Хүн гагцхүү эх орондоо л хамгийн тайван, аюулгүй, найдвартай хамгаалалтанд байж чаддаг юм байна. Харийн улс бол харийн л улс. Эх орон гэдэг ямар үнэ цэнэтэйг, тэр тусмаа Монголын сайхан орон минь үнэхээр гайхалтай сайхан орон болохыг чин зүрх сэтгэлээсээ мэдэрч, мэдэж авсандаа баяртай байна. Миний эх орны мөнх тэнгэр, алтан нар, цэнгэг агаар, цэвэр ус, аюулгүй тайван орчин...энэ бүхний үнэ цэнийг мэдрүүлсэн Бээжин хотдоо баярлалаа.

Хоёр дахь дурлал

Гэр бүлтэй бүх хүмүүст зориулав

Би дурлачихжээ... тэр сайхан хүнд. Түүний дүр нүдэнд үзэгдэж, үнэр нь амьсгалтай минь хамт үнэртэж, шөнө зүүднээс салахгүй, өдөр бодлоос салахгүй сэтгэл догдлуулж, зүрх булгилуулаад байх юм. Би чамд хайртай гэж мянга мянган удаа зөвхөн өөртөө шивнэхээс өөр аргагүй, эзэнд нь хэлж болохгүй хоёр дахь дурлал...
Магадгүй зарим хүмүүсийн хувьд эзэнд нь хэлэхийг яарах л байсан байх, ямар ч учрал тохиолдоход өөрийгөө зөвтгөн дэмжиж улам бүр тэмүүлэх, эсвэл буруу талыг нь олж харан өөрийгөө хориглож, сэтгэлээ номхотгох хандлага аль аль нь байдаг болохоор тэр. Харин миний хувьд бол хоёрдох хандлагыг сонгож байна. Хэрвээ түүнд би чамд дурлачихжээ гээд хэлчихвэл тэр цагаас хойш түүнд тодорхой хэмжээний цагийг зарцуулж байх шаардлагатай болно. Учир нь бараг бүх л хүн тийм үгэнд дуртай бөгөөд ихэнх зүйлийн ирээдүйн хор уршгийг харж чаддаггүй болохоор тэр. Магад жоохон л алсыг харвал түүнд хэдий хэмжээгээр цаг зарж байна төдий хэмжээгээр гэр бүлдээ зарцуулдаг цаг минь багасч... тэр хэмжээгээр гэр бүлийхээ сайхан аз жаргалуудаас мэдрэхээ больж, магадгүй сайхан гэр бүлээ үгүй хийж ч болзошгүй. Тэгвэл миний үр хүүхдийн нүдэнд гуниг хуран, цоггүй болж, ухаан нь сэтгэхгүй болж улмаар итгэл нь мөхөж, сэтгэл нь үхэх болно. Тэр үед би аз жаргалтай хүн байж чадна гэж үү?

Тиймээс л би хоёр дахь хандлагыг сонгож байгаа юм. Би чинь сайхан гэр бүлтэй хүн. Би гэр бүлдээ хайртай, маш их хайртай. Миний хань, үр хүүхдүүд маань миний хувьд бүх зүйл маань. Бид мартагдашгүй, гайхалтай, үнэ цэнэтэй дурсамжаар дүүрэн амьдардаг. Гэр бүл гэдэг хэн бүхний бий болгож чаддаг өчүүхэн зүйл биш, маш их ухаан, тэвчээр, бас хөдөлмөр, зүтгэлийн үр шимээр бий болдог хүний амьдралын хамгийн үнэ цэнэтэй зүйл.

Харин хоёр дахь дурлалын хувьд бол зүгээр л нэг эсрэг хүйстэндээ татагддаг хүний хорвоогийн үзэгдэл. Сайн бас муу талтай. Хорвоод сайн, сайхан хүмүүс олон байдаг. Магадгүй би хоёр дахь хүнд сэтгэл алдарвал өөр бас хэн нэгэнд сэтгэл алдрахгүй гэх баталгаа байхгүй. Тэр болгонд дурлаад, өмнөх амьдралаа сүйтгэвэл би хэн болж хувирах вэ?. Тэр жинхэнэ амьдрал болж чадна гэж үү? Үгүй, Там болох биз.

Данзанравжаа хутагтын Шавь нартаа зориулсан сургаалийн
Учрахын урьд эр эм болсугай хэмээн хүсдэг,
Учрах сацуу элэг бөөр мэт үлэмж янагладаг
Удалгүй уйдах сэтгэл төрж, бие биеэсээ гэм эрэн хэрэлддэг
Олон бусдын эр эм сайн хэмээн гуниг сэтгэл төрдөг
гэсэн бадаг хүн гэдэг сайхан, бас муухай амьтны уйсах сэтгэл жолоогүй тухай өгүүлсэн байдаг. Эндээс харахад бидний ихэнхд маань уйсахын мунхаг сэтгэл нуугдаж байдаг. Тэрхүү мунхаг сэтгэлд хөтлөгдөн үйлдэл хийвээс ямар хор уршигт хүрэхийг дээр олоод харсан гэдэгт итгэж байна.
Харин хань ижлийнхээ бас өөрийнхөө уйсах сэтгэлийг дарж, үргэлж шинээр амьдрах боломж бололцоо, ухаан бас бидэнд байдаг. Тэр бол өөрийн ханьдаа дахин дурлаж, эсвэл ханиа өөртөө дахин дурлуулж амьдрах. Түүний тулд өөрийнхөө ханьтай учирч, догдолж байсан, бас бэрхшээлийг даван туулж сайн сайхныг бүтээж байсан үнэ цэнэтэй, гайхалтай дурсамжуудаа байнга сэргээн санаж, тийм дурсамжийнхаа тоог нэмж амьдрах, бас байнга өөрсддөө анхаарал тавьж, өөрсдийгөө хайрлан эрхлүүлж байх, биесдээ гэнэтийн бэлэг барьж байх, өөрсдийгөө эерэг, зөв, сайн талруу байнга өөрчилж байх, бүсгүйчүүдийн хувьд улам бүр гоё сайхан болох... гэх мэт олон арга байж болно. Үүний дараа өөрийнхөө хань ижлийг бодон Би дурлачихжээ... Би чамдаа дахин дурлачихаж. Чиний минь дүр нүдэнд үзэгдэж, үнэр нь амьсгалтай минь хамт үнэртэж, шөнө зүүднээс салахгүй, өдөр бодлоос салахгүй сэтгэл догдлуулж, зүрх булгилуулаад байх юм. Би чамдаа хайртай гэж өөрт нь дахин дахин хэлээрэй.
Тэгж чадан амьдарсан цагт та өөртөө болон гэр бүлдээ, бас эх орондоо үнэ цэнэтэй хүн нь байж чадна.

Сэтгэлзүйн шинжлэх ухаанд хүнийг эсрэг хүйстэндээ хөнгөхөн дурлаж, түүнээсээ эрч хүч, урам зориг, сэдэл тэмүүллээ сэлбэж байхыг санал болгодог. Харин хэзээ ч гүн дурлаж болохгүй. Тэгвэл баяр жаргалыг бус зовлон, бэрхшээлийг авчрах болно гэж зөвлөдөг.
Хүн өөрийн амьдралаа өөрөө л зурдаг. Хөнгөхөн дурлаж сэтгэлийн таашаалыг хүртэж байх, эсвэл гүн дурлаж сэтгэл зүрхээ шархлуулж, өөрийн болон өрөөлийн гэр бүлийг сүйтгэх бүх үр дагавар бидний шийдвэрээс шалтгаалдаг болохоор бид мунхаг сэтгэлийнхээ боол нь бус эзэн нь байж, жоохон л ухаан гаргаснаар зөв шийдвэр гаргаж үнэ цэнэтэй, аз жаргалтай амьдралыг бүтээж чадна.

Амьдрал гэдэг болзоо биш

Бид бүгд л бие биедээ дурлаж, дурласан сэтгэл хайр болон бадарч, улмаар болзоо... аз жаргал... мартагдашгүй дурсамжууд үргэлжилдэг.
Гэвч өнөөгийн ихэнх залуус маань хайртай гэх хүнтэйгээ хэдхэн удаа болзоод эсвэл гэр бүл болох гэдгийг болзоотойгоо адилхан хялбараар бодож гэр бүл болохоор шийдвэр гаргаж байна...

Гэр бүл болж хамт амьдрах, өөрийн амьдралаа зохиож, аав, ээж болох энэ амьдралд ямар асуудлууд үүсдэг, ямар хэрэгцээ, шаардлагууд гарч ирдэг, ямар бэрхшээл, саад тотгор, магадгүй зовлон хүлээж байдаг, тэр бүгдэд би бэлэн үү? гэдгийг ихэнх залуус өөрөөсөө асуудаггүй, тэр талаар боддоггүй. Өнөө л болзоотойгоо адилхан, халуун дотно үгсийг байнга сонсох мэт, хайр гэрэлтэж, баярлаж догдолсон инээмсэглэл мөнх байх мэт, болзоо адил цаг үргэлж хамт тэврэлдэн зогсох мэт, байнга зоогийн газар хооллож, байнга кино, үзвэр үзэж бие амар явах мэт... энэ мэтчилэн бүх л зүйл аяндаа сайн сайхан үргэлжлэх мэт санадаг.

Үүний хор уршгаар амьдрал там болон хувирах тохиолдол ч байдаг. Тухайлбал: Өдөржин ажлаа хийж ядраад, гэртээ харьж тайван амрах гэтэл гэр гэж нохойн хороо мэт, замбраагүй, муухай... дээрээс нь ажил хийгээд ирсэн хүнийг амраад ирсэн мэт аашилж, хол, ойрын зүйлд зарах, адилхан л хамт хийнэ гэж туйлшрах... ядарч ирээд сайхан хоол идэх гэтэл хоолой давахгүй бараг нохой ч тоож идэхгүй юм хийсэн байх... Хувцсаа солих гэтэл өнгөө алдсан, үрчийж арчийсан хэдэн хувцас... Бэр, эсвэл хүргэнийхээ муу тал, ажилгүй, анхиагүйг харж залхсан ээж, аавын зах хязгааргүйгээр үргэлжлэх үгс... өөр маш олон зүйлүүд ар араасаа үргэлжилнэ. Тухайлбал: Хардалт, атаархал,хагацал...

Амьдрал гэдэг бол болзоо биш ээ. Болзоон дээр цаг үргэлж баярлаж догдолж байдаг бол амьдрал дээр уурлах, бухимдах, гуниглах, сэтгэлээр унах гэх мэт сэтгэл хөдлөлийн өөр бусад үзэгдлүүд үзэгддэг. Болзоон дээр зоогийн газар хооллолдог бол амьдрал дээр гэртээ, ханийхаа хийсэн хоолыг идэх болно. Болзооны тэр хэдхэн минутанд баяр баясал, аз жаргал л учирдаг бол амьдрал урт учраас янз бүрийн л зүйл, тэр тусмаа үхэл, хагацал гэх мэт хүний орчлонд тохиолддог хамгийн хүнд зовлонтой ч нүүр тулж болно.

Тиймээс л амьдрал бол болзоо биш гэж гэр бүл болох гэж буй залуусдаа дахин дахин хэлье.

Эрхэм залуу эмэгтэй, эсвэл эрэгтэй хэн ч гэсэн гэр бүл болохын өмнө гэрлэх гэж буй хүнтэйгээ хамт сууж, бие биесийхээ хийж чаддаг болон чаддаггүй зүйл, сайхан болон муухай зан, давуу болон сул талуудыг цувуулан бичээд, тааламжгүй санагдсан хариулт бүрийн цаана ямар асуудлууд гарч ирж болох, тэрхүү асуудалд хэрхэн хандах хандлага, хамтдаа шийдэж чадах боломжуудаа тунгаан бодоорой.
Тухайлбал: эмэгтэй нь их унтах дуртай , тиймээс надад учирч болох асуудлууд нь өглөөний цайгүй ажилдаа явах, хүүхэд төрвөл өдөржин ажилд дарагдан ядарч ирсэн ч гэсэн шөнө босч хүүхдээ саатуулах, гэх мэт өөр ямар асуудлууд үүсч болохыг хамт цувуулан бичээд, хэрхэн яаж шийдэх шийдвэрээ бас олж бичнэ үү? Тааламжтай, сайхан хариултын ард ч мөн асуудал нуугдаж байдаг юм шүү. Жишээлбэл. Эхнэр, эсвэл нөхөр тань хэтэрхий өглөгч бол яах вэ? бодох л асуудал.

Ингээд магадгүй бүх зүйлд та хоёр хариултаа олж харж чадсан бол эхний ээлжинд болж байна гэсэн үг. Магадгүй бид амьдралд тохиолдох бүх зүйлийг олон хувилбараар нь авч үзэж чадахгүй хэдий ч ямартай ч эхний төсөөлөн, харж шийдвэрлэснээр гэр бүл болж болно. Харин хамт шийдвэрээ гаргаж, харилцан хайрлалцаж, гэр бүл болон, хамтын амьдралаа эхэлсэн л бол тооцоолоогүй асуудал гарч ирэх тухайн үед хамт байж, асуудлыг даван туулж чадна аа гэж бодож байна.

Ингээд шинээр гэр бүл болж буй бүх залуустаа амжилт хүсье.

Гэр бүл болно гэдэг олон асуудал, бэрхшээлтэй тулгарах, тэдгээр олон асуудалд зөвөөр хандах хандлага, хамтын маш их хариуцлага, маш их хариуцлагыг үүрдэг учраас маш их аз жаргал, бүр амтлаад амтлаад ханашгүй аз жаргалууд энэ бүгдийн нийлбэр байдаг юм шүү.

"Гэр бүл" - миний үнэт гоёл

Гоёл ....
Биднийг чимж, бас бидэнд сэтгэлийн таашаал өгч, өөртөө итгэлтэй алхах урам зориг төрүүлж, өөрийн эрхгүй баясгаж, баярлуулж, догдлуулж байдаг зүйл бол “гоёл”. Нэн ялангуяа, бүсгүйчүүд биднийг гоё сайхан чимэг зүүлтгүйгээр төсөөлөхийн аргагүй.
Алмаз, эрдэнийн чулуу, алт, мөнгөн гоёлууд... нэрлээд дуусашгүй.
Гэвч, ямар ч үнэт эрдэнийн чулуугаар сольшгүй, миний хамгийн үнэтэй гоёл бол “миний гэр бүл”. Би “Гэр бүл”-ээрээ өөрийгөө чимэх дуртай. Учир нь мөнгөөр ямар ч гоёлыг, хэн ч худалдан авах боломжтой, харин гэр бүлийг хичнээн их мөнгө байгаад ч худалдан авах боломжгүй.
“Гэр бүл” гэдэг бидний сэтгэл зүрх, хайр хүндэтгэлээрээ соёолуулаад, өөрийн харилцаа, буулт, ойлголцол, тэсвэр тэвчээрийн хүчээр урган төлжүүлж, улмаар хүлээцтэй байдал, эв нэгдэл, итгэлцлээр батжин бэхжүүлж байж урт удаан хугацаанд, өөрийн бие сэтгэлээрээ бүтээсэн “үнэт гоёл” минь. Энэ гоёл хэн бүхэнд давтагдашгүй цорын ганц бөгөөд, хэний ч хувьд дахин үйлдвэрлэх боломжгүй.

Маш их үнэ цэнэтэй болохоор надаас маш их сэтгэл, итгэл, халамж, анхаарлыг шаардаж байдаг. Үнэтэй чулуун гоёлыг нэг л худалдаад авчихвал чухал үедээ гаргаж зүүчихээд, бусад үед далд хийгээд орхичихдог бол "гэр бүл" хэмээх энэхүү гоёл далд хийгээд, мартатлаа нам дараад суучих ойлголт байхгүй, цаг үргэлж халамж, анхаарал шаарддагаараа онцлогтой. Хэтэрхий эмзэг нандин зүйл болохоор биднийг өөр ямар нэгэн зүйлрүү анхаарлаа хандуулахыг андахгүй... Магадгүй өдөр бүр багахан ч болтугай цагаа зориулж, анхаарлаа хандуулж, сэтгэлээ зориулж байхгүй бол нэг л мэдэхэд сэвтэн гоёхын аргагүй зүйл болон хувирна... Өнгөө алдсан гоёлыг сольж, өөр шинийг худалдан авах боломжтой бол харин "гэр бүл" хэмээх гоёлыг дахин худалдан авч хэзээ ч болохгүй... Тиймээс л байнгын анхаарал, халамж, тордолгоо хэрэгтэй байдаг.

Хамгийн чухал нь “гэр бүл” хэмээх гоёл миний дээд хэрэгцээнүүдийг хангаж, намайг хайрлан хүндэтгэж, өөрийгөө илэрхийлэх талбар болж, өсч хөгжихөд дэмжлэг туслалцаа болж байдаг. Өөр ямар ч гоёл тэгж чадахгүй...
Миний залуу нас, сэтгэл зүрх, хайр хүндэтгэл, итгэл гээд тоочиж баршгүй олон зүйлийн, хэмжээлшгүй их үнэ цэнээр олдоод, хамгийн их утга учрыг мэдрүүлж, хамгийн их баяр бахдал, сэтгэл ханамж, аз жаргалыг авчирч, амжилт бүтээлийн эх ундарга нь болж байдаг учир би “гэр бүл”-тэйдээ бахархаж, бас омогшиж явдаг. Тийм ч болохоор “гэр бүл”-ээрээ өөрийгөө чимэх дуртай.

“Гэр бүл” маань миний “Үнэт гоёл”.

Залуу хосууддаа бичсэн захидал

Сайн байцгаана уу?
Гал голомтоо бадрааж, нэгэн гэр бүл болон, огт таньж мэдэхгүй байсан хүний үрийг сэтгэл зүрхнээсээ хайрлан, хүндэтгэж, дотроо бусдаас харамлан, хамгаалан яваа эрхэм та бүхэндээ энэ захидлыг унших өдрийн мэндийг хүргэе.

Юуны өмнө заяаныхаа ханийг олоод, гэр бүл хэмээх юутай ч зүйрлэшгүй үнэт зүйлийг бий болгон, үрийн зулай үнэрлэн, үртэй болохын жаргалыг эдлэн суугаа залуу хосууддаа баяр хүргэж, эрүүл энх сайн сайхныг хүсье.

Цаг цагаараа байдаггүй, цахилдаг хөхөөрөө байдаггүй гэж сайхан сургаал байдаг. Бидний сэтгэл ч мөн адил нэг хэвээрээ биш. Тиймээс та бүхэндээ залуу хосуудын амьдралд тохиолддог нэгэн бэрхшээлийн цаад учгийг ухааруулан, илүү их сэтгэлийн хаттай байж, гэр бүл хэмээх үнэт зүйлээ хэзээд хамгаалж байхыг сануулах үүднээс энэхүү захидлаа бичиж сууна.

Гэр бүл болно гэдэг амаргүй даваа. Амархан, хялбархан зүйл байсан бол гэр бүл салат гэдэг ойлголт байхгүй байх байсан гэдэгтэй санал нийлэх бизээ. Эхлээд амар, хялбар мэт боловч нэг л өдөр тэсэж, тэвчихийн аргагүй болж, бүх зүйлд чи буруутгагдаж, бүх хүмүүс чамруу арслан бар мэт дайрч байгаа юм шиг, бүхий л зүйл чиний нуруун дээр байгаа мэт санагдах үе тохиолдно.

Тэр цагт магадгүй хадам, эсвэл ханийн тань сайн санаж хэлсэн үг танд цаанаа л нэг ёозгүй, таныг буруутгаад байгаа юм шиг бодогдоно. Хайрлаад харж байгаа харц нь хүйтэн, энхрийлээд инээж буй инээмсэглэл нь хуурамч мэт санагдана...

Өөрийн тэрхүү сөрөг бодлыг нэг, хоёр, гурав магадгүй тав, арав тэвчинэ... улмаар тэсрэнэ. Тэр цагт амьдрал тань утгагүй мэт санагдаж, тэвчихийн арга алга хэмээн өөрийгөө зөвтгөн, бусдыг буруутгаж, салахаас өөр зам алга хэмээн ухаантан болж, уурлаж бухимдах үе ирнэ.

Салчихвал бүх л зүйл болоод явчих юм шиг... Хүүхдээ ганцаараа хэнээс ч дутуугүй өсгөчихнө... Өөрийгөө хүн шиг аваад явчихна... Магадгүй өөр сайхан хүмүүс зөндөө л байна... гэх мэт мунхаглана.

Ийм амин хувиа хичээсэн бодол хэн бүхний толгойд харавсан сум мэт л ороод ирнэ. Гэвч толгойд орж ирж байгаа бодол бүхэн үнэн, зөв биш. Магадгүй та хоёр хүүхэдтэй болж амжаагүй байгаа бол танд тийм ЭРХ байж болох юм. Харин ХҮҮХЭДтэй болсон бол танд тэгэх эрх байхгүй бөгөөд та хүүхэдтэй болсон л бол тэр хүүхдээ ХҮН шиг ХҮН болгох үүрэгтэй. Яагаад гэвэл та өөрийнхөө эрхийг эдлээд ханиа сонгоод, гэр бүл болоод, хүүхэд төрүүлээд, бас тэр бүгдээс цагтаа аз жаргалыг хангалттай эдэлсэн. Тиймээс одоо үүргээ хүлээж ХОЁУЛ ХАМТдаа хүүхдээ өсгөн хүмүүжүүлэх ҮҮРЭГтэй.

Та хүүхэдтэй болсон л бол ТАНД САЛАХ ЭРХ байхгүй.

Учир нь таны эцэг, эхийг хорвоогийн хамгийн баян, хамгийн үзэсгэлэнтэй хүнээр солихыг хүсвэл та хэзээ ч солихгүй. Сэгсгэр ч гэсэн ээж минь, сиймхий ч гэсэн гэр минь гэдэг өвөг дээдсийн минь сайхан сургаал бий. Тиймээс таны хүүхдэд ганцхан төрүүлсэн эцэг, эх нь л хэрэгтэй. Тэд л түүнийг жинхнээсээ хайрлан, энхрийлж, эрхлүүлж, хүн шиг хүн болгон өсгөж чадна. Өөр хэнбугай ч таны хүүхдийн эцэг эсвэл эхийг орлож чадахгүй.

Та хүүхдээ нүдэндээ ямар ч гал цоггүй, баяр баясалгүй, аз жаргалгүй, үүрд эцэг эсвэл эхийнхээ хэн нэгнийг хэзээ ирэх бол доо хэмээн горьдсон нүдээр ширтэн суухыг нь харахыг хүсэхгүй.

Тиймээс амиа бодсон дээрх бодол орж ирсэн тэр цагт толгойгоо сэгсрэн, бодлоосоо хурдан салаад, үр хүүхэд, гэр бүлээ бодон, сэтгэлгээгээ эерэг тийш жолоодон, хүмүүсийн хэлж буй зүйл чухал биш миний бодол, үйлдэл л чухал гэдгийг ухаарах хэрэгтэй.

Бусад хүмүүс чамайг ойлгохгүй байж болно харин чи өөрийгөө ойлгох хэрэгтэй... Бусад хүмүүс таны гэр бүлийг үймүүлж болно харин чи өөрөө гэр бүлээ үймүүлж болохгүй...

Бусад хүмүүс үглэж болно... тэд үглэг л дээ... бид бусдын үглэхийг хэзээ ч болиулж чадахгүй... Харин түүнд хандах хандлагаа өөрчилж чадна, тиймээс гэр бүл, үр хүүхдийнхээ төлөө үглэхийг нь сонсоогүй мэт байя ...

Гэхдээ ойр тойрны чинь хэн нэгэн үг хэлж байгаа нь хэзээ ч биднийг муу яваасай гэсэндээ бус бидний сайн сайхны төлөө байдаг гэдгийг үргэлж санаж байх хэрэгтэй. Тэд маань биднийг юмаа сайхан хийгээсэй, илүү сайн яваасай гэж боддог боловч хэзээ, хэрхэн яаж хэлэх аргаа мэддэггүй, харилцааны боловсрол сулхан байдаг гэдгийг хүлээн зөвшөөрөх хэрэгтэй.

Тэгээд л бодчиход бүх зүйл хөнгөхөн болоод ирнэ. Та тэвчээр бас ухаан гаргаж ГЭР БҮЛээ хамгаалж чадаж байгаадаа өөртөө баяр хүргэж, бас өөрөөрөө бахархаж болно.

ГЭР БҮЛ бүхэн эрүүл энх байж, дэргэдээ буй аз жаргалаа алхам тутамдаа мэдэрч байхыг хүсье.

АМАР АМГАЛАН МОНГОЛ ГЭР БҮЛ- МОНГОЛ ХҮҮХЭД- МОНГОЛЫН ИРЭЭДҮЙ

Хүндэтгэн ёсолсон: Ж.Хорлоо

Бэрхшээл бүхэндээ талархъя

Амар хялбарын цаана амжилт байдаг бол бүх хүн л амжилтанд хүрэх байсан. Гэвч бүх хүмүүс амжилтанд хүрдэггүйн учиг бэрхшээлд дургүйд оршино. Аливаа ажил, амьдрал, харилцаанд тохиолдож буй бэрхшээл бүхэн бидний төлөө, биднийг улам бүр өндөр амжилтанд хүргэхийн тулд оршдог. Биднийг улам илүү чадварлаг, сайн сайхан байлгахын тулд, бидний аз жаргал, сэтгэл ханамжийг илүүтэй мэдрүүлэхийн тулд... байдаг.

Жишээлбэл: Ханиад хүрээд, халуурч нэг өдөр магадгүй гурав хоног орондоо хэвтээгүй хүн эрүүл байхын аз жаргалаа төдийлөн анзаардаггүй. Ганц бие хүний зовлонг сонсоогүй бол гэр бүлтэйнхээ жаргалыг мэдэрдэггүй...гэх мэт.

Тодруулбал: гэр бүлийн хувьд үүссэн зөрчил биднийг бие биетэйгээ халуухан яриа үүсгэх боломж олгон, улмаар бие биесээ гүн гүнзгий ойлгож, улам бүр хайрлахын эх үүсвэр болдог. Үнэндээ ямар нэг маргаан зөрчил гараагүй бол бид сэтгэлдээ буй зүйлийг төдийлөн гүн гүнзгий ярьдаггүй. Тиймээс л тэрхүү үл ойлголцлын бэрхшээлийн цаана гүн ойлголцол нуугдаж байдаг учир энэхүү бэрхшээлд талархахаас өөр аргагүй.

Яг одоо миний ажилд бас нэгэн том бэрхшээл гарч ирчихээд л байна. Харин би түүнийг миний ажлыг улам бүр амжилттай болгох, миний хүсэл мөрөөдлийг биелэхэд дэм болох улам бүр илүү боломж, нөхцөл гарч ирэх гэж байгаа юм байна... хэмээн бодон, итгэл дүүрэн улам шаргуу ажиллаж байна...

Бэрхшээл танд талархъя.

Цаг нь болохоор цэцэг ногоо саадгүй ургадаг

Зорилготой хүмүүсийн хувьд төлөвлөсөн ажил нь товлосон хугацаандаа биелэхгүй байх тохиолдол олон байдаг. Тэр үед ихэнх хүмүүсийн хувьд л урам хугардаг..., магадгүй аль нэг, эсвэл хэд хэдэн зорилт нь удаан хугацаагаар биелэхгүй байх үед өөртөө итгэл алдрах, чадахгүй юм байна, бүтэхгүй юм байна хэмээн шантардаг...

Тэгвэл тэр үед танд "Цаг нь болохоор цэцэг ногоо өөрөө аяндаа, саадгүй ургадаг" байгалийн хууль тус болно. Үнэхээр хавар болохоор, цэцэг ногоо хэний ч туслалцаагүйгээр өөрөө аяндаа л ургадаг. Өвөл мянгантаа хүсээд ч гадаа буй модыг навчислахыг харахгүй. Түүнтэй адил үнэхээр бидний зорилт биелэгдэх цаг хугацаа нь болсон бол өөрөө аяндаа л энергийн хуулиар зохицуулагдан, хэрэгтэй цагтаа, хэрэгтэй хүмүүстэйгээ уулзаж бүх зүйл ногоон гэрэл, цагаан шугамаар хялбархан бүтэх болно.

Тиймээс зорилт тань биелэгдэхгүй байгаа үед: "Биелэх цаг нь болоогүйг бодоход ямар нэг зүйл нь дутуу байгаа юм байна" гээд, тухайн зүйлээ улам бүр задлан шинжилж, олон өнцгөөс нь харж, яг юу нь болж байгаа, юу нь болохгүй байгаа, юу дутагдаж байгаа, одоо юу юу нэмж хийвэл улам илүү сайн болж болохыг илрүүлэн, улам бүр боловсронгүй болгоорой... Тийнхүү гуних завгүй ажиллаж байтал нэг л мэдэхэд зорилт тань биелэж, таныг дараагийн том зорилтруу урин дуудах болно.

Хүн бүхэнд төлөвлөсөн ажил нь сэтгэлчлэн бүтэх боломжийг олгох уужуу ухаан, тууштай зан чанар, хичээл зүтгэлийг хүсье.

Өөрөө өөрийгөө л гундаах хэрэггүй...

Хэзээ нэгэн цагт бусад хүмүүс, тэр тусмаа гэр бүлийн тань хэн нэгэн, магадгүй хань ижил тань өөрийг тань ойлгохгүй, хэрэггүй муухай үгсийг, сайхан сэтгэлрүү тань цацах үе тохиолдоно. Ихэнх хүмүүсийн хувьд, тийм явдал тохиолдоход сэтгэлээр унах, гомдох, гуних, гутрах асуудлууд үүсдэг. Харин эрхэм та, сэтгэлийн дээрх муу үзэгдлүүдэд боломж бүү өгөөрэй. Учир нь таны сэтгэл ямар байх вэ? гэдгийг эцсийн дүндээ, та л шийднэ шүү дээ. Өөр бусад таныг гомдоох зүйл хийсэн хэдий ч, та гуниснаараа өөрөө өөрийгөө бас давхар гомдоож, гундааж байна гэсэн үг. Тиймээс бусад хүмүүс итгэдэггүй л юм байгаа биз, харин өөрөө өөртөө ямагт итгэж, өөрөө өөрийгөө ямагт хайрлан хүндэтгэж явах үүднээс гомдол, харуусал, гуниг гутрал гэх мэт муухай сэтгэл хөдлөлүүдийг үл оруулан, хайр, итгэл, хүсэл, мөрөөдөл, зорилго, тэмүүлэл гэх зэрэг сайхан зүйлсээр л сэтгэлээ хөглөцгөөе.
Яг одоо, надад энэ асуудал тулгарсан байна. Гэвч, би гуниагүй... Учир нь, тэд намайг ойлгох түвшинд хүрээгүй өчүүхэн амьтад, харин би тэдний тэнэг араншинг уучилж чадахуйц ухаантай хүн. Тиймээс л тэднийг уучлаад, өөрийнхөө энергийг зөвхөн хэрэгтэй зүйлдээ зарцуулан, яаралгүй чухал ажилдаа үнэт цагаа зориулан, хичээнгүйлэн ажиллаж байна. Өдөр хоног ямар хурдан өнгөрдөг билээ? Түүнийг мэдсээр байж гуниг гутралд автан, үнэт цагаа хоосон, үр ашиггүй өнгөрүүлнэ гэдэг бол зорилгогүй, зүтгэлгүй хүмүүсийн хийдэг зүйл болохоос зорилготой, хүсэл тэмүүлэлтэй хүний хийдэг зүйл биш. Тиймээс миний сэтгэлрүү ус цацсан ч, цацсан усыг нь шиврээ бороо мэт баяртайгаар хүлээн авах сэтгэлийн тэнхээтэй ухаан надад байна. Миний гэгээн сэтгэлийн хилрүү хэн ч үл нэвтэрч чаднам.

Миний хань

Анх хөдөөний бор охин, хотод оюутан болж, дээд сургуулийн хаалгаар орох үедээ, Дээд сургууль гэдэг үнэхээр боловсролтой, соёлтой, ёс суртахуунтай гайхалтай сайхан оюутан залуусаар дүүрсэн газар байгаа даа... гэж бодон, урам зориг дүүрэн, сэтгэл өөдрөг орж билээ. Харамсалтай нь би хэтрүүлж бодсон байлаа... Манай ангид бүдүүлэг, бас ухаан муутай хэдэн хөвгүүн байсан. Нэг нь, нийслэлийн нэг дунд сургуулийн захирлын хүүхэд байсан. Сургуулийн захирлын хүүхэд ёс суртхуунгүй байна гэдэг үнэхээр гутамшигтай санагдаж байлаа. Тэр үеэс л, боловсрол мэдлэг гэдэг ямар өчүүхэн юм бэ? хүний зан чанар, төрөлх араншин, ХҮН ЧАНАР гэдэг ямар агуу зүйл вэ? гэдгийг ухаарч ойлгосон. /Харин, хүн чанартай, ёс суртахуунтай хүн боловсрол, мэдлэгтэй байвал улам хүчирхэг болно гэдэгтэй санал нэг байгаа гэж итгэж байна/

Түүнийг ойлгоогүй байсан бол би өдийд юу хийгээд, хаагуур явж байх нь тодорхойгүй... магадгүй амьдралынхаа зорилгыг ч олоогүй, бүр зорилгогүй ч явж байж болох байсан. Учир нь хүний амьдралд хань ижил гэдэг хамгийн чухал үүрэгтэй. Ямар хүнтэй сууснаас бидний хувь тавилан шууд шалтгаалдаг.

Миний хувьд үнэхээр хүн чанартай, сайн залуутай суусан, азтай бүсгүй. Нөхөр маань миний 10 жилийн ангийн хүүхэд. Намайг сургуульд байхаасаа л дотроо хайрлаж, хүндэтгэж ирсэн хүн. Надад чин сэтгэлээсээ хайртай учраас, надад итгэн, намайг дураар минь, хүссэнээр минь байлгадаг. Би 2005 оноос эхлэн хувь хүний хөгжил, 2007 оноос хүүхдийн хөгжил төлөвшил судалж, тэр чиглэлийн лекц, сургалт зохион байгуулж ирсэн. Бизнесийн байгууллагад бус, Төрийн бус байгууллагад харьяалагдан, өглөөнөөс орой хүртэл бус хүссэн цагтаа ажиллаж, хүссэн цагтаа ном уншиж, юм судалж, дотроо маш их хүсэл тэмүүлэлтэй, зорилготой ажилладаг боловч, гаднаа хэн нэгэнд ажилгүй мэт харагддаг байсан. Тиймээс зарим хамаатнууд маань, Их сургуулийг бизнесийн удирдлагаар онц төгссөн мөртлөө, ажил хийсэнгүй, өөртөө ямар ч холбогдолгүй хүний хөгжил эн тэр гэж дэмий зүйл яръж явлаа хэмээн зэмлэдэг байлаа. Харин нөхрийн маань хувьд тийм биш. Жоохон хүүхэдтэй залуу хосын хувьд мөнгө төгрөгөөр гачигдах үе байдаг л байсан. Гэсэн хэдий ч нөхөр маань, хэзээд цалин, мөнгөөр юмыг хэмждэггүй бас үнэлдэггүй учир, зөв зүйлийг бодож, зөв юм хийж байгаа гэдэгт маань итгэдэг байлаа. Тийм ч болохоор өнөөдөр би хүссэнээ хийж, зорьсноо биелүүлж чаддаг. Тэр боломжийг гагцхүү хань минь л өгсөн. Тиймээс хайрт ханьдаа цаг үргэлж талархаж явдаг.

Магадгүй би хүн чанаргүй, мөнгөнөөс өөр зүйл толгойд нь буухгүй болчихсон хэн нэгэнтэй суусан бол өөрийнхөө хүсэл мөрөөдлөөр амьдарч, амьдралынхаа зорилгыг олж авахгүйгээр, шууд л аль нэг компанид орон, ажлын мал болчихсон явж байх байсан.

Энэхүү бичлэгийг уншиж суугаа охид, бүсгүйчүүддээ, ганц олдох амьдралынхаа ханийг зөв сонгохыг хүсч байна.

Халгиж цалгисан амжилт

2009 оны 12-р сарын 24-ны өглөө, нөхөртөө цайг нь аягалах гэж байгаад сагуулаад асгачихлаа... Магадгүй тэр тохиолдолд зарим хүмүүс -ээ халаг гэж, зарим нь -ээ салга гэж, зарим нь бүр -өө бүтэлгүй юм, би дандаа л бүтэлгүйтэх юм гэж хэлэх байсан. Харин миний хувьд асгарсан цайруу харан инээмсэглэж, -өнөөдөр ч миний хайрын ажил төрөл бүтэмжтэй байж, халгиж цалгих нь дээ... гэж нөхөртөө хэлсэн юм. Нөхөр маань ч өөдөөс харан инээж байлаа... Улмаар нөхөр, 2 хүүхэдтэйгээ албандаа явлаа... /өглөөдөө нөхөр маань хүүхдүүдээ цэцэрлэгт нь хүргэж өгдөг/. Би гэртээ үлдлээ. 11 цагаас хүнтэй уулзахаар тохирсон байсан учир түүнээс өмнө гэр орноо янзлах гээд яаравчилж байлаа... тэгээд бүх ажлаа амжуулж, яг гэрээсээ гарах гэтэл бас нэг юм татаад асгачихлаа... түүнийг арчиж янзлана гэвэл болзсон цагаасаа хожимдох байсан учир, өөртөө: -хайр нь ч мөн адил өнөөдөр амжилтаар халгиж цалгих нь гэж дотроо шивнэн хэлээд, инээмсэглэн гэрээсээ шууд гарлаа...

Орой ямар үр дүн биднийг хүлээж байсан гээч... Яг л миний хэлсэн амжилт, халгиж цалгисан тэр их амжилт... Нөхөр маань, ажил нь үнэхээр амжилттай байлаа гэсээр ирлээ. Өмнөөс нь би, хайрых нь ажил ч бас амжилттай байлаа... Хайр нь хамтарч ажиллах санал авсан, надтай уулзсан тэр хүн өнөөдөр шинийн-8, энэ сайхан өдөр хамтарч ажиллах болсондоо маш их баяртай байна гэсэн гэж ам уралдан амжилтаа ярьцгааж билээ.

Энэ бүх зүйл бол Энергийн хуультай холбоотой. Магадгүй би тэдгээр бүтэлгүй зүйлийг хараад сөргөөр сэтгэж, урам хугаран, ямар ч баяр баясалгүй гэрээс гарсан бол тийм азтай зүйлс тохиолдохгүй байсан. Тиймээс уншигч та ч бас сэтгэлгээгээ ямагт эерэг байлгаж, амьдралын эерэг эрчимтэй өөрийгөө холбоорой....

"Таныг минь мөнх тэнгэр ивээг"

Хайрт ээж М.Чимэдрагчаа, Б.Баярсайхан болон өөрийнхөө хайрлаж, хүндэтгэдэг бүх хүмүүст зориулав.
Та ч бас хайрт ээждээ болон хайрлаж, хүндэтгэдэг хүмүүстээ уншиж өгөөрэй.

"Таныг минь мөнх тэнгэр ивээг"

Та минь байгаа болохоор
Тэнгэрээс би ивээл гуйна
Тэнгисээс би энерги гуйна
Буурлаас би нас гуйна
Бурханаас би заяа гуйна.

Та минь байгаа болохоор
Өөртөө биш тандаа гуйна...

Танруу мишээсэн бүхнийг
Тэнгэр ивээдэг болохоор
Танруу харсан бүхэнд
Тэнгисийн энерги шингэдэг болохоор
Танаар бахархсан бүхнийг
Нас буян дагадаг болохоор
Таныг хайрласан бүхний заяаг
Бурхан түшдэг болохоор
Өөртөө биш, тандаа гуйна.

Та минь байгаа болохоор
Би өөртөө юу ч гуйхгүй
Таныг хайрласны төлөө
Тэд намайг ивээдэг.

Таныг минь мөнх тэнгэр ивээг.
Ж.Хорлоо /2006 он/

Миний явсан зам бүхэн намайг амжилт, аз жаргалруу хөтөлж байдаг.

2009 оны 6-р сард, манай ХӨГЖИЛ хүний хөгжлийн төвийн хүндэт гишүүн О.Булганхангайгийн санаачилсан "ЭЭЖДЭЭ БИЧСЭН 1000 ЗАХИДАЛ" нэртэй номны нээлт болсон бөгөөд бид бүгд борлуулалтан дээр нь ажиллаж байсан билээ. Тэр үед Хөдөө Аж Ахуйн Их Сургуулийн нэг багшид номоо танилцуулчихаад гараад иртэл, нэг автобус яг хөдлөх гэж байлаа... зайсангийн тэндхийн автобусууд манай ажлын тэнд очдог болохоор олон юм бодолгүй, шууд гүйж очоод суучихлаа. Тэгээд Лениний музейн баруун талын 4 замын уулзвараас зүүн гар тийш буюу Цэцэг төв рүү эргэх байх гэсэн чинь эсрэгээрээ баруун гар тийш МУБИС-н зүг эргэчихлээ... за, яах вэ дээ... Бассейн орж бүртгүүлье гээд амжихгүй яваад байсан болохоор, бүртгүүлэх боломж гарлаа гэж бодоод багшийн дээдийн урдуур гаран явж байтал, бараг сүүлийн 7 хоног уулзах юмсан, ажил дээр нь очиж сургалт явуулж өгөнгөө, номноосоо хэдийг борлуулчих юмсан гэж бодож явсан Дэлгэрмаа гэдэг эгчтэйгээ уулздаг юм байна. Яг тэр үед, "Миний явсан зам бүхэн намайг амжилт, аз жаргалруу хөтөлдөг" гэсэн энэ гайхалтай үг толгойд орж ирж билээ.

Үнэхээр бид бүгдийн толгойд буй бодол, үг, үйлдэл, зорилго, хийж буй бүх зүйл маань эерэг сайн, сайхан зүйлрүү тэмүүлж байдаг бол энергийн хуулийн дагуу бидний явсан зам бүхэн биднийг амжилт, аз жаргалруу хөтлөх болно. Учир нь энергийн хуулиар "Ижил нь ижлээ" дууддаг. Магадгүй танд бүтэлгүй явдал тохиолдсон байж болох юм, тэгвэл түүнээс ч бүтэлгүй зүйл учрах байсныг хаасан нь тэр байсан гэж ойлгоорой. Бүр байнга бүтэлгүйтээд байвал, өөрийгөө сайн ажиглаж, юу бодоод, юу хийгээд байгаадаа дүн шинжилгээ хийгээрэй. Магадгүй сайн, сайханруу хэтэрхий тэмүүлээд, хэн нэгэнд муу зүйлийг хийгээд байгаа юм биш биз???

"Нэг хаалга хаагдахад, хоёр хаалга нээгддэг"

Эрхэм та зорилгодоо хүрэх гээд чармайн ажилласаар байна уу? Өмнө тань ямар нэг бэрхшээл тохиолдон, магадгүй нэг бэрхшээлийг давчихаад байтал дахин бэрхшээл гарч ирж, урам зоригийг тань мохоож байна уу? тэгвэл бүү сэтгэлээр унаарай.

Миний хувьд байгальд хайртай нэгэн. Тиймээс явган аялах, усанд сэлэх, цанаар гулгах, цэцэг тарих, гоё өнгийн чулуу болон эрдэнийн чулуу цуглуулах сонирхолтой.
Би нялх мөчрийг суулган, том болохыг нь, өндөр ургаж, цэцэглэхийг нь харах дуртай. Нялх мөчир хэрхэн цэцэглэн дээшилж буйтай адилхан ажил, амьдрал минь улам бүр дэлгэрч байна гэж боддог.

Нэг удаа би цэцгүүдээ услах гэж байгаад, нэлээд олон хоног хүлээн байж ургуулсан хэдэн навчсыг нь унагачихлаа... тэр үед хайран юм гэж дотроо харамсаж байсан. Гэтэл хэд хоногийн дараа нөгөө унасан навчнуудын оромноос хоёр, хоёр навчны соёо цухуйж байхыг олж харсан. Тэгээд маш их баярлаж, амьдралд нэг хаалга хаагдахад хоёр хаалга, хүсвэл түүнээс ч олон хаалга нээгдэж байдаг гэсэн үгийг улам бүр ухаарч билээ. Одоо тэр унасан навчисны оронд олон салаа навчтай мөчрүүд ургасан байгаа.

Яг энэ байгалийн хууль миний амьдралд биеллээ олдог. Тиймээс, таны ажил, амьдралд ч мөн биеллээ олох болно. Танд улам бүр өндөр амжилтыг хүсье.

Миний амьдралын зорилго

Хүн бүхэн харилцан адилгүй байдаг. Тэд бүгд л өөрийн гэсэн өвөрмөц дүр төрх, зан чанар, авьяас чадвартай. Би ч бас адил...

Намайг Ж.Хорлоо гэдэг. Ж гэдэг овгийн маань эхний үсгийг авчихаар Хорлоо гэдэг нэр нүцгэн зогсож байгаа юм шиг л санагддаг. Тиймээс хэзээд Ж.Хорлоо гэж хэлэх бас бичих дуртай. Би хонины орд. Хүүхэд шиг гэнэн цайлган, цагаахан, итгэмтгий, бас үргэлж баяр баяслыг тээж явдаг сэтгэл зүрх минь энэ ордны төрөлхийн мөн чанар... Миний онцлог чанар бол бусдыг хайрлах, чин сэтгэлээсээ хүндэтгэх чадвар. Ямар ч нөхцөл байдалд хувиа хичээдэггүй, хэзээд найрсаг байж бусдад туслахад бэлэн халуун дотно сэтгэл... ХҮН ЧАНАР... Шударга зан чанар, итгэл даах чадвар, үнэнч тууштай байдал... Өөрийгөө ЖИНХЭНЭ ХҮН гэж үнэлдэг, бас хүндэтгэдэг миний АМЬДРАЛЫН ЗОРИЛГО бол 21-р зууны НЭРТ СУРГАН ХҮМҮҮЖҮҮЛЭГЧ болох. Гагцхүү жинхэнэ хүн л хүнийг бий болгож чадна гэж итгэдэг.

Хүн бүхэн бусдаас онцгой зан чанар, авьяас чадвартай боловч ихэнх хүмүүс энэ хорвоо дээр зүгээр л амьд явж байдаг. Эрхэм та эргэн тойрноо нэг сайн ажиглаарай... Тэгээд тэдний амьдарч буй байдал, амьдралдаа хандах хандлагад дүн шинжилгээ хийж үзээрэй... Магадгүй зарим нэг нь ямар ч зорилгогүйгээр ТВ-н суваг солин, хэрэгтэй хэрэггүй зүйлсийг үзэж суугаа харагдана, зарим нь зүгээр л дэлгүүр хэснэ... зарим нь ямар ч хэрэгцээгүй зүйлд мөнгөө үрнэ... зарим нь өөрийгөө гоёх гэж, сайхан харагдах гэж бүхэл өдөржин тольны өмнө эргэлдэнэ... зарим нь орж ирсэн хүмүүстэй хууч хөөрч, хов жив, болж бүтэхгүй зүйлсийн талаар ярилцана... та хүмүүсийн үнэт цаг, хэрхэн үнэ цэнэгүй өнгөрч, хайран амьдрал нь урсан одохыг харах болно. Ингэхэд таны АМЬДРАЛЫН ЗОРИЛГО юу вэ? Хэрвээ түүнийгээ маш сайн мэдэж, түүнийхээ төлөө ажиллаж, амьдарч байгаа бол танд баяр хүргэе. Танаар бахархаж байна. Харин үгүй бол та яг одоо цаас гаргаад өөрийхөө тухай эргэцүүлэн бичээрэй, өөрийнхөө онцлог, давуу тал, сонирхдог зүйл, хийх дуртай ажил, түүнийг хийхдээ аз жаргалтай, баяр баясалтай болдог зүйл... гэх мэт, тэгээд өөрийнхөө амьдралын зорилгыг олж нээгээрэй. Яг энэ мөчөөс хойш амьдралынхаа зорилгын төлөө, хором мөч бүхнийг үр ашигтай бүтээлчээр өнгөрүүлж, зорилгодоо заавал хүрээрэй. Тэгээд зорилгодоо хүрснийхээ дараа надтай холбогдож, талархлаа илэрхийлээрэй, хэ хэ.
За, бүх зүйлд тань АМЖИЛТ хүсье. Та өөрийнхөө амьдралын зорилгод хүрэх гэж энэ хорвоод, тэгэхдээ бүр МОНГОЛ УЛС-ын иргэн болж мэндэлсэн юм шүү.